पुणे : वृत्तसंस्था
पत्नीने फोनवर आय लव्ह यू म्हटले नाही म्हणून मद्यपी पतीने पत्नीला लाकडी बांबूने मारहाण करुन गंभीर जखमी केले. हा प्रकार 29 फेब्रुवारी रोजी सायंकाळी साडेसहा वाजण्याच्या सुमारास कात्रज येथील लेकटाउन सोसायटीच्या दुचाकी पार्किंगमध्ये घडला आहे. याप्रकरणी भारती विद्यापीठ पोलिसांनी आरोपी पतीवर गुन्हा दाखल केला आहे.
मिळालेल्या माहितीनुसार, याबाबत 23 वर्षीय महिलेने शुक्रवारी दि.१ भारती विद्यापीठ पोलीस ठाण्यात फिर्याद दिली आहे. यावरुन सुरज रमेश खुडे (वय-28 रा. गोसावी वस्ती, कोथरुड) याच्यावर आयपीसी 324, 323, 504 नुसार गुन्हा दाखल केला आहे. पोलिसांनी दिलेल्या माहितीनुसार, फिर्यादी महिला घरकाम करता. गुरुवारी सायंकाळी त्या लेकटाउन सोसायटीत राहणाऱ्या बहिणीकडे गेल्या होत्या. त्यावेळी आरोपीने दारु पिऊन फोन करुन आय लव्ह यू बोल असे सांगितले. मात्र, त्यांनी नकार दिला. याचा राग आल्याने आरोपी फिर्य़ादी यांच्या बहिणीच्या सोसायटीत आला. त्याने फिर्यादी यांना सोसायटीच्या दुचाकी पार्कींग मध्ये शिवीगाळ करुन हाताने मारहाण केली. तसेच झाडावर ढकलून देत लाकडी बांबूने माराहाण करुन गंभीर जखमी केले. पुढील तपास पोलीस करीत आहेत.
