भुसावळ : प्रतिनिधी
प्लॉट खरेदी करून देण्याच्या बहाण्याने रेल्वेच्या सेवानिवृत्त कर्मचाऱ्याकडून १८ लाख रुपये घेऊन प्लॉटची खरेदी करून न दिल्याचा प्रकार शहरात घडला. या प्रकरणी सागर शिवदास वानखडे (६३, रा. इंद्रप्रस्थनगर, भुसावळ) यांच्या फिर्यादीवरून महेंद्र उर्फ विकी प्रकाश संसारे (साकरी फाटा, वरणगाव रोड, भुसावळ) याच्याविरोधात शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, वानखडे यांनी फसवणुकीनंतर दिलेल्या तक्रारीनुसार माहिती अशी की, सव्र्व्हे क्रमांक १८८/१/१९०/२/अ मधील प्लॉट क्रमांक ७९ हा तक्रारदारांना विक्री करण्याच्या बहाण्याने विकी संसारे याने १८ लाख रुपये स्वीकारले. मात्र, प्लॉटची खरेदी करून दिली नाही.
आरोपी महेंद्र संसारे याने मीच तुम्हाला ३० लाख रुपये दिले आहेत, असा आरोपदेखील केला आहे. तसेच तुम्हीच माझे पैसे परत द्या, नाहीतर मी तुम्हाला बघून घेईन… तुमची तक्रार देईन, अशी धमकीसुद्धा दिली असल्याचे तक्रारीत म्हटले आहे. पोलिस निरीक्षक संदीप रणदिवे यांच्या मार्गदर्शनाखाली सपोनि किशोर पवार पुढील तपास करत आहेत.
