यावल : प्रतिनिधी
जळगाव जिल्ह्यातील अनेक ग्रामीण भागात आज देखील वाळू चोरी मोठ्या प्रमाणात सुरु आहे. अवैध वाळू वाहून नेणाऱ्या ट्रॅक्टरची ट्रॉली उलटून झालेल्या अपघातात एकाचा मृत्यू झाला. याप्रकरणी गुन्हा दाखल करण्यात आला आहे.
मिळालेल्या माहितीनुसार, तालुक्यातील चिखली खुर्द गावाजवळच्या एका शेतात अवैध वाळू उपसा करणाऱ्या ट्रॅक्टरची ट्रॉली उलटल्याची घटना घडली. या संदर्भात यावल पोलिस स्थानकात दिलेल्या फिर्यादीत नमूद केले आहे की, चिखली खुर्द येथील शेताजवळ यावल तालुक्यातील टाकरखेडा येथील विनोद राजू कोळी (वय ३६) हा अवैध वाळू विना क्रमांकाच्या ट्रॅक्टरमधून वाहून नेत होता.
दरम्यान, अचानक ट्रॉली उलटली. यात ट्रॉलीमध्ये बसलेला विष्णू तिलकचंद सोनवणे (४१, रा. भालशिव, ता. यावल) हा इसम त्याखाली दबला गेल्याने जागीच ठार झाला. या संदर्भात चिखली खुर्द येथील पोलिस पाटील रवींद्र बाबूराव सावळे यांनी फैजपूर पोलिस स्थानकात दिलेल्या फिर्यादीनुसार ट्रॅक्टरचा मालक काशीनाथ नथ्थू कोळी (रा. भालशिव, ता. यावल) आणि चालक विनोद राजू कोळी यांच्या विरोधात भादंवि गुन्हा दाखल करण्यात आला आहे. या प्रकरणाचा पुढील तपास सपोनि नीलेश वाघ यांच्या मार्गदर्शनाखाली कॉ. राजेश बहाटे व उमेश चौधरी हे करीत आहेत.
