जळगाव : प्रतिनिधी
शहरापासून नजीक असलेल्या आसोदा येथे मित्राची व अन्य दोघांची बोलचाल सुरू असताना, त्या ठिकाणी गेलेल्या निखिल वसंत बिन्हाडे (१७) या तरुणावर धारदार शस्त्राने वार करून जखमी करत मारहाण करण्यात आली. ही घटना तालुक्यातील आसोदा येथे शुक्रवार, १६ फेब्रुवारी रोजी रात्री घडली. या प्रकरणी शनिवार, १७ फेब्रुवारी रोजी तालुका पोलिस ठाण्यात दोन जणांविरुद्ध गुन्हा दाखल करण्यात आला आहे.
शुक्रवारी रात्री निखिल बिन्हाडे याचा मित्र ऋतिक बिन्हाडे व अन्य दोघांमध्ये बोलचाल सुरू होती. त्यावेळी निखिल तेथे गेला, याचा राग आल्याने दोघांनी त्याला बेदम मारहाण करून कानाजवळ धारदार वस्तू मारत जीवे ठार मारण्याची धमकी दिली. या प्रकरणी निखिल बिन्हाडे याने शनिवारी तालुका ठाण्यात फिर्याद दिली. त्यावरून मारहाण करणाऱ्या दोघांविरुद्ध गुन्हा दाखल करण्यात आला. पुढील तपास पोहेकॉ. सुधाकर शिंदे करत आहेत.
