जळगाव : प्रतिनिधी
लोकसभा निवडणुकीच्या लवकरच बिगुल वाजणार असल्याची शक्यता आहे. जळगाव जिल्ह्यातील लोकसभा निवडणुकीचे भाजपा व शिवसेना उद्धव ठाकरे गटाकडून रणशिंग एकाच दिवशी फुंकणार आहे. त्यामुळे जळगाव जिल्ह्यात लोकसभा निवडणुकीची चुरस पहावयास मिळणार आहे.
निवडणुकीसाठी आतापासूनच जळगाव जिल्ह्यात राजकीय पक्षांकडून मोर्चा बांधणीला सुरुवात झाली आहे. भाजपाचे केंद्रीय मंत्री अमित शहा व शिवसेनेचे युवा नेते आदित्य ठाकरे हे 15 रोजी जळगाव जिल्ह्याच्या दौऱ्यावर येत आहे.
लोकसभा निवडणुकीच्या पार्श्वभूमीवर जळगाव लोकसभा मतदारसंघात आतापासूनच निवडणुकीचे पूर्वतयारीसाठी लगबग सुरू झालेली दिसत आहे. या पार्श्वभूमीवर भाजपचे केंद्रीय गृहमंत्री अमित शहा यांचा जळगाव दौरा हा महत्त्वाचा ठरणार आहे. जळगाव येथे क्लस्टर बैठक घेतली जाणार असून याबाबत जामनेर येथे रविवारी बैठक घेण्यात आली.
ठाकरेंच्या चार सभा
गुरुवारी आदित्य ठाकरे हेदेखील जळगाव दौऱ्यावर येत आहेत. जळगाव, शिरसोली, कासोदा व भडगाव याठिकाणी सभा घेतील. जळगाव लोकसभा मतदारसंघ हा ठाकरे गटाला मिळाल्याचा दावा संजय सावंत यांनी केला. त्यामुळे आदित्य ठाकरे येथून लोकसभेसाठी रणशिंग फुंकणार असल्याचे बोलले जात आहे.
