नंदुबार : वृत्तसंस्था
राज्यातील अनेक शहरात छोट्या मोठ्या कारणाने गुन्हेगारी वाढू लागली असतांना नुकतेच नंदुरबार जिल्ह्यात देखील एक घटना घडली आहे. आपल्या प्रेयसीसोबत बोलत असल्याच्या संशयातून एकाने रिक्षा चालकावर चाकूने हल्ला करून जखमी केले. पोहरा (ता. अक्कलकुवा) शिवारात ४ फेब्रुवारी रोजी सायंकाळी साडेसहा वाजता ही घटना घडली होती. जखमीवर जिल्हा रुग्णालयात उपचार सुरू आहेत. नितेश तुळशीदास तडवी (रा. पोहरा) असे हल्ला झालेल्या रिक्षाचालकाचे नाव आहे.
मिळालेल्या माहितीनुसार, नितेश हा रविवारी सायंकाळी रिक्षा घेऊन अक्कलकुवा येथून पोहरा गावाकडे जात असताना रोशन सौंदऱ्या वसावे (२८) व वेच्या दिलवर तडवी (२७, दोघे रा. पोहरा, ता. अक्कलकुवा) यांनी त्यास अडवले होते. यावेळी रोशन वसावे याने तू माझ्या प्रेयसीसोबत कशाला बोलतो असे बोलून मारहाण केली.
यादरम्यान रोशन याने खिशातून चाकू काढून कंबर आणि मनगटावर वार केला होता. यातून नितेश हा जखमी झाला होता. यावेळी वेच्या तडवी यानेही नितेश याला मारहाण केली होती. यादरम्यान नितेश याचा बचाव करण्यासाठी आलेल्या संतोष तडवी यालाही दोघांनी मारहाण केली. जखमी नितेश तडवी याला तातडीने जिल्हा रुग्णालयात हलवण्यात आले. याप्रकरणी नितेश तडवी याने दिलेल्या फिर्यादीवरून रोशन वसावे (२८) व वेच्या दिलवर तडवी (२७) या दोघांविरोधात अक्कलकुवा पोलिस ठाण्यात गुन्हा दाखल करण्यात आला आहे. तपास सहायक पोलिस उपनिरीक्षक देविदास वडघुले करत आहेत.
