पाचोरा : प्रतिनिधी
येथील बसस्थानकातील जळगाव बसमध्ये चढताना एका महिलेच्या गळ्यातील ७ ग्रॅम वजनाची २० हजारांची सोन्याची पोत अज्ञात चोरट्याने लांबवल्याची घटना घडली असून या प्रकरणी पाचोरा पोलिस ठाण्यात अज्ञात चोरट्याविरुद्ध गुन्हा नोंदवण्यात आला आहे.
मिळालेल्या माहितीनुसार, मालेगाव येथील सटाणा नाका परिसरातील अयोध्या नगरमधील वैष्णवी ज्ञानेश्वर जाधव (वय २३) या खासगी कामानिमित्त पाचोरा येथे आल्या होत्या. दरम्यान, २ फेब्रुवारी रोजी दुपारी ३ वाजेच्या सुमारास वैष्णवी जाधव या पाचोरा येथून पाथरी या गावी जाण्यासाठी पाचोरा ते जळगाव बसमध्ये चढत असताना त्यांच्या गळ्यातील सोन्याची पोत अज्ञात चोरट्याने चोरुन पोबारा केला. काही वेळाने वैष्णवी जाधव यांच्या लक्षात चोरीची घटना येताच त्यांनी तपासले असता सोन्याच्या पोतचा अर्धा भाग त्यांना साडीत आढळून आला. मात्र, ७ ग्रॅम वजनाची २० हजारांचे सोने चोरीस गेले. या प्रकरणी वैष्णवी जाधव यांच्या फिर्यादीवरून पाचोरा पोलिस ठाण्यात अज्ञात चोरट्याविरुद्ध चोरीचा गुन्हा नोंदवण्यात आला आहे. या घटनेचा तपास पोलिस कॉन्स्टेबल मुकुंद परदेशी करत आहेत.
