जामनेर : प्रतिनिधी
तालुक्यातील पहूर कसबेतील रहिवासी रामदास बिंबाजी जाधव हे सकाळी साडेआठच्या दरम्यान शेतात दुचाकीने जात असताना छत्रपती संभाजीनगर-जळगाव महामार्गाच्या बाजूला असलेल्या नामलीला जिनिंगजवळ चार युवकांनी दुचाकी अडवली. गळ्यातील एक तोळा व बोटातील तीन ग्रॅम वजनाची अंगठी हिसकावून पोबारा केला आहे. दिवसा घडलेल्या घटनेने परिसरात खळबळ उडाली आहे.
मिळालेल्या माहितीनुसार, गुरुवारी सकाळी साडेआठ वाजता रामदास बिंबाजी जाधव हे छत्रपती संभाजीनगर महामार्गावरील पेट्रोल पंपावरून दुचाकीत पेट्रोल भरून जळगाव महामार्गावर असलेल्या नामलिला जिनिंगजवळ असलेल्या शेताजवळ पोहोचले. यादरम्यान जळगावकडून एका दुचाकीवर दोन युवक व पहूरकडून एका दुचाकीवरून दोन युवक अशा चौघांनी जाधव यांना अडविले. त्यांच्यावर पांढरी पावडर टाकण्याचा प्रयत्न केला.
गळ्यातील सोनसाखळी व अंगठी ओरबाडून घेत असताना शेजारील शेतात असलेल्या मजूर महिलांनी हे पाहून आरडाओरड केली. त्यामुळे चौघांनी दुचाकीवरून पहूरच्या दिशेकडे पोबारा केला. दिवसा घडलेल्या घटनेने परिसरात खळबळ उडाली आहे. घटनेची माहिती मिळताच पोलिस कर्मचारी ज्ञानेश्वर ढाकरे व गोपाळ माळी यांनी रामदास जाधव यांच्याकडून माहिती घेत तपास सुरू केला आहे. याप्रकरणी पहूर पोलिसात उशिरापर्यंत तक्रारदारांनी तक्रार दाखल केली नव्हती.
