जळगाव : प्रतिनिधी
दोन वर्षांसाठी हद्दपार असताना तलवार घेऊन दहशत पसरविणाऱ्या व २२ गंभीर गुन्हे दाखल असलेला दिनकर ऊर्फ पिण्या रोहिदास चव्हाण (वय २६, रा. सुप्रीम कॉलनी) याला एमआयडीसी पोलिसांनी ताब्यात घेत तलवार जप्त केली, पिण्याविरुद्ध एमआयडीसी पोलिसांत गुन्हा दाखल करण्यात आला आहे.
मिळालेल्या माहितीनुसार, एमआयडीसी पोलिस ठाण्याच्या हद्दीतील दिनकर ऊर्फ पिण्या रोहिदास चव्हाण याच्यावर दोन वर्षांसाठी हद्दपारीची कारवाई करण्यात आली आहे. तो हद्दपार असताना सुप्रीम कॉलनी परिसरात तलवार घेऊन दहशत पसरवीत असल्याची माहिती पोलिस निरीक्षक जयपाल हिरे यांना मिळाली. त्यांनी गुन्हे शोध पथकातील पोलिस उपनिरीक्षक दीपक जगदाळे, सहायक फौजदार अतुल वंजारी, राहुल रगडे, सचिन पाटील, विशाल कोळी, सतीश गरजे, मंदार पाटील यांना कारवाईच्या सूचना दिल्या. त्यानुसार पथकाने दिनकर जवळून तलवार जप्त करीत त्याला ताब्यात घेतले व त्याच्याविरुद्ध गुन्हा दाखल करण्यात आला. त्याला न्यायमूर्ती जे, एस. केळकर यांच्या न्यायालयात हजर केले असता, त्याची कारागृहात रवानगी केली.
