जामनेर : प्रतिनिधी
विटांनी भरलेले मालवाहू वाहन गटारीच्या ढाप्यावरून जात असताना तो ढापाच तुटला. त्यामुळे हे वाहन उलटले. यात विटांखाली दबला गेल्याने एक जण जागीच ठार झाला. तर, एक जण गंभीर जखमी आणि दोन जण किरकोळ जखमी झाले आहेत. जखमींवर शासकीय वैद्यकीय महाविद्यालयात उपचार सुरू आहेत.
मिळालेल्या माहितीनुसार, म्हसावदवरून नेरी मार्गे अजिंठाकडे जाणारी एम.एच. ०४ डी.डी. ७७०९ ही विटांनी भरलेली गाडी नेरी दिगर येथील विकास सोसायटीजवळ समोर उभ्या असलेल्या कापसाच्या गाडीला ओव्हरटेक करत होती. त्याचवेळी रस्त्याच्या बाजूला असलेल्या गटारीवरून गाडी गेल्यामुळे गटारीचा ढापा तुटला आणि गाडी उलटी होऊन एक मजूर गाडी आणि विटांमध्ये दाबला जाऊन ठार झाला. श्याम तुळशीराम पाठे (वय ३२, रा. अजिंठा) असे मयताचे नाव आहे. तर सुनील गाटोगे हा गंभीर जखमी झाला. चालक सलमान खान युसूफ खान आणि एक जण जखमी झाला आहे. त्यांना जळगाव येथे शासकीय वैद्यकीय महाविद्यालय आणि रुग्णालयात दाखल करण्यात आले. अपघात झाला त्यावेळेस मोठा आवाज झाल्यामुळे गावातील तरुणांनी मोठ्या संख्येने मदत करून मयत व जखमींना बाहेर काढण्यासाठी प्रयत्न केले.
