भुसावळ : प्रतिनिधी
शेतातील सामायिक ट्यूबवेलचे पाणी घेण्यावरून एका शेतकऱ्याला दोन जणांनी काठी व फावड्याने मारहाण करून गंभीर दुखापत केल्याची घटना १७ रोजी भुसावळ तालुक्यातील वांजोळा शिवारात घडली. याप्रकरणी आपसातल्या दोघा नातेवाइकांविरोधात भुसावळ तालुका पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, भुसावळ शहरातील बहिरूंबा बाबा मंदिराजवळील रहिवासी राजेंद्र यादव बावस्कर (५२) हे या घटनेत जखमी झाले आहेत. शेती करून ते आपला उदरनिर्वाह करतात. बुधवारी १७ रोजी सकाळी साडेनऊ वाजता ते वांजोळा शिवारातील त्यांच्या शेतात सामायिक ट्यूबवेलमधून पिकांना पाणी भरत होते. त्यावेळी रवींद्र यादव बावस्कर आणि पंकज रवींद्र बावस्कर (दोन्ही रा. खळवाडी, भुसावळ) यांनी राजेंद्र यांना मारहाण केली. या मारहाणीत ते गंभीर जखमी झाले. याप्रकरणी दुपारी ५ वाजता भुसावळ तालुका पोलिस ठाण्यात गुन्हा दाखल करण्यात आला आहे. पुढील तपास पो.हे.कॉ. वाल्मीक सोनवणे हे करीत आहेत.
