जळगाव : प्रतिनिधी
प्रत्येकाच्या परिवारात सासू – सुनेमध्ये वाद होत असतात पण सासू सुनांच्या कौटुंबिक वादातून विषारी औषध प्राशन केलेल्या मैसुनाबाई दिलीप तडवी (४५, रा. घोरकुंड, ता. सोयगाव) या सासूचा जळगावातील शासकीय वैद्यकीय महाविद्यालय व रुग्णालयात उपचारादरम्यान मृत्यू झाला. दरम्यान, यावेळी झटापटीत विषारी औषध सुनांच्या अंगावरही पडल्याने त्यांनाही विषबाधा झाली असून त्यांच्यावर उपचार सुरू आहे.
मिळालेल्या माहितीनुसार, सोयगाव तालुक्यातील घोरकुंड येथे मैसुनाबाई तडवी यांचा मंगळवार, १६ जानेवारी रोजी संध्याकाळी त्यांच्या सुना सपना राजू तडवी (२५) आणि रुबिना आशिष तडवी (२२) यांच्यासोबत वाद झाला होता. यात मैसुनाबाई यांनी रागाच्या भरात पिकांवर फवारणीचे औषध सेवन केले. दोन्ही सुनांनी त्यांना रोखण्याचा प्रयत्न केला. यात त्यांच्या अंगावरही विषारी औषध पडले व त्यांनादेखील विषबाधा झाला. तिघींना पाचोरा ग्रामीण रुग्णालयात नेले. मैसुनाबाई यांची प्रकृती खालावल्याने त्यांच्यासह सुनांनादेखील जळगाव शासकीय वैद्यकीय महाविद्यालय व रुग्णालयात उपचारार्थ दाखल करण्यात आले. उपचार सुरू असताना रात्री मैसुनाबाई यांचा मृत्यू झाला. एमआयडीसी पोलिसात अकस्मात मृत्यूची नोंद करण्यात आली आहे
