नवी दिल्ली : वृत्तसंस्था
देशभरातील अनेक गुन्हेगारी घटना नेहमीच प्रेमप्रकरण तर पैश्याच्या वादातून होत असतात, अशीच एक धक्कादायक घटन उघडकीस आली आहे. सीवूड येथे झालेल्या बिल्डरच्या हत्येप्रकरणी एनआरआय पोलिसांनी मृत विकासकाची पत्नी आणि तिचा प्रियकर या दोघांना ताब्यात घेतले आहे. विकासकाचा विविध गुन्ह्यांत सहभाग असल्याने संपत्ती जप्त होण्याच्या भीतीने त्यांनी हत्या केल्याचा उलगडा झाल्याचे पोलिसांनी सांगितले.
मिळालेल्या माहितीनुसार, सीवूड सेक्टर ४४ येथील अमन डेव्हलपर्सचे मनोजकुमार सिंग (३९) यांची शनिवारी हत्या झाली होती. कार्यालयात त्यांचा मृतदेह आढळला होता. मृत सिंग यांच्यावरही फसवणुकीचे सहा गुन्हे दाखल आहेत. त्यामुळे हत्येमागे आर्थिक वादाचे कारण आहे का? असा प्रश्न निर्माण झाला होता. मात्र, या हत्येमागे सिंग यांचाच कामगार व पत्नी असल्याचा उलगडा पोलिसांनी केला आहे. सिंगच्या कार्यालयात काम करणारा राजू उर्फ शमसूल अबुहुरेरा खान (२२) याच्यासोबत पत्नी पूनम सिंगचे प्रेमसंबंध होते, असे उपायुक्त विवेक पानसरे यांनी पत्रकार परिषदेत सांगितले. हत्येच्या घटनेनंतर तपासासाठी एनआरआय पोलिसांनी राजू याला ताब्यात घेऊन चौकशी केल्यावर त्याने गुन्ह्याची कबुली दिली.
