बोदवड : प्रतिनिधी
पत्नीच्या मृत्यूनंतर पतीनेही आत्महत्या केल्याची घटना बोदवड तालुक्यात साळशिंगी येथे घडली. या घटनेमुळे दोन मुले पोरकी झाली आहेत. या घटनेबाबत परिसरात हळहळ व्यक्त होत आहे.
मिळालेल्या माहितीनुसार, तालुक्यातील साळशिंगी येथील हरतालिका विनोद महाजन (वय ४०) या महिलेने काही ही कारणामुळे चार-पाच दिवसांपूर्वी विष घेतले होते. तिच्यावर जळगाव येथे उपचार सुरू असताना उपचारादरम्यान रविवारी ७ रोजी तिचा मृत्यू झाला. सोमवारी या महिलेचे तिसरे होते. हा कार्यक्रम झाल्यावर या महिलेचा पती विनोद सुभाष महाजन (वय ४५) हा घरी कोणास काहीही न सांगता निघून गेला. यानंतर त्याचा तपास लागला नाही. दरम्यान, शुक्रवारी १२ रोजी सकाळी नऊ वाजेच्या सुमारास त्याचा मृतदेह तालुक्यातील सोनोटी शिवारात झाडाला लटकलेल्या अवस्थेत आढळून आला. त्यांच्या पश्चात दोन लहान मुले असून एक मुलगा १४ वर्षांचा, तर मुलगी १२ वर्षांची आहे. या घटनेने गाव सुन्न झाले आहे. याप्रकरणी विनोदचा मोठा भाऊ सुनील महाजन यांच्या फिर्यादीवरून बोदवड पोलिसात अकस्मात मृत्यूची नोंद करण्यात आली आहे. पुढील तपास आयुब तडवी करीत आहेत.
