कोल्हापूर : वृत्तसंस्था
गेल्या काही महिन्यापासून राज्यातील ठाकरे गट अनेक अडचणीत असतांना पुन्हा एकदा ठाकरे गटाचे तालुकाध्यक्षाची धक्कादायक बातमी समोर आली आहे. तालुकाध्यक्षाच्या पराक्रमामुळे कोल्हापुरातील ठाकरे गटाच्या अस्मितेला धक्का लागला आहे. एक लाखाला तीन लाख रुपये बनवून नोटा छापून देण्याचा प्रकार तालुकाध्यक्षांने सुरू केला होता. या प्रकरणी पाेलिसांनी तीन जणांना अटक केली आहे.
मिळालेल्या माहितीनुसार, या टोळीचा सूत्रधार अशोक बापू पाटील (वय ५१, रा. बेलवळे खुर्द, ता. कागल) हा आहे. त्याच्यासह मेहरूम अल्ताफ सरकवास (वय ४१) आणि सलील रफिक सय्यद (वय ३०, दोघे रा. घटप्रभा, जि. बेळगाव, कर्नाटक) या तिघांना अटक करण्यात आली आहे. त्यांच्याकडून एक लाखाची रोकड आणि नोटा छपाईचे साहित्य असा दीड लाखांचा मुद्देमाल हस्तगत केला. या तिघांची पोलिस कोठडीत रवानगी करण्यात आल्याचे पाेलिसांनी नमूद केले.
संशयित अशोक पाटील हा कर्जबाजारी आणि आर्थिक गरजवंतांना हेरुन कर्नाटकातील साथीदारांच्या मदतीने तिप्पट रक्कम देण्याचे आमिष दाखवत आहे, अशी माहिती पोलीस अधीक्षक महेंद्र पंडित यांना मिळाली हाेती. पोलीस अधीक्षक पंडित यांनी स्थानिक गुन्हे अन्वेषण विभागाला या गुन्ह्याचा छडा लावण्याचे आदेश दिले हाेते. अशोक पाटील हा शिवसेना ठाकरे गटाचा कागल तालुका अध्यक्ष आहे अशी माहिती पोलीस तपासात पुढे आली आहे. मेहरूम सरकवास महिला असल्याचे सांगण्यात आले.
