अकोला : वृत्तसंस्था
राज्यातील अनेक छोट्या मोठ्या शहरातून अनेक अल्पवयीन मुलीचे अपहरण होत असल्याच्या अनेक घटना उघडकीस येत असतांना नुकतेच अकोला शहरातील महाकाली कॉलनीमध्ये एका साडे चार वर्षीय चिमुकलीचे अपहरण केल्याची धक्कादायक घटना उघडकीस आली. या प्रकरणी रामदास पेठ पोलीस ठाण्यात तक्रार दाखल करण्यात आली होती. पोलिसांनी बारा तासांच्या आत चिमुकलीचा शोध घेत अपहरणकर्त्या महिलेला अटक केली आहे.
मिलेल्ल्या माहितीनुसार, चंद्रपूर शहरातील महाकाली कॉलनीमध्ये राहणारे मालाकार कुटुंब कामानिमित्त अकोल्यात आले होते. दि.५ जानेवारी रोजी दुपारच्या सुमारास त्यांची साडेचार वर्षांची गुड्डी ही खेळत खेळत टिळक मारुती मंदिराकडे गेली. त्याच वेळी एक लाल साडी घातलेली महिला त्या ठिकाणी आली व लहान मुलीला चॉकलेटचे आमिष दाखवत तिला सोबत घेऊन गेली. या घटनेची माहिती मिळताच मुलीच्या आई वडिलांच्या संपूर्ण परिसरात शोध घेतला परंतु मुलगी कुठेही आढळून न आल्याने अखेर त्यांनी रामदास पेठ पोलीस स्टेशनला धाव घेतली.
सदरचे घटनेचे गांभीर्य राखत जिल्हा पोलीस अधीक्षक बच्चन सिंह यांच्या मार्गदर्शनात रामदास पेठ पोलीस स्टेशनचे पोलीस निरीक्षक मनोज बहुरे यांनी तपासाची यंत्रणा कामी लावली व बारा तासाच्या आत अपहरण झालेल्या मुलीचा शोध घेतला. आज (शनिवार, ६ जानेवारी) दुपारच्या सुमारास रामदास पेठ पोलिसांनी अकोट फाईल भागातील बापू नगरमध्ये सदर महिलेच्या घरी शोध मोहीम राबविली. त्या ठिकाणी अपहरण झालेली मुलगी ही सुरक्षित रित्या आढळून आली, रामदास पेठ पोलिसांनी सदर महिलेला ताब्यात घेतली असून आज दुपारी तिला न्यायालयात नेण्यात येणार असल्याची माहिती पोलिसांनी दिली आहे.
