भुसावळ : प्रतिनिधी
रस्त्यावर उभ्या ट्रकवर मागून येणारी दुचाकी जाऊन धडकली. यात शिंदी ग्रामपंचायतीचा कर्मचारी संग्रामसिंग बाबूलाल राजपूत (३८, रा. शिंदी ता. भुसावळ) हा ठार झाला. ही घटना गुरुवारी रात्री १०:३० वाजता चोरवड गावाजवळ घडली.
मिळालेल्या माहितीनुसार, जामनेर तालुक्यातील तळेगाव येथील संशयित चारचाकी वाहनचालक विलास भिवसन पाडोळसे (वय ३९) याने आपल्या ताब्यातील ट्रक चोरवड गावाजवळ उभा केला होता. त्याच वेळेस संग्रामसिंग राजपूत हा दुचाकी वाहनाने कुन्हे पानाचे गावाहून भुसावळकडे दुचाकीने येत होता. अंदाज न आल्याने तो दुचाकीसह रस्त्यावर उभ्या ट्रकवर जाऊन धडकला. यात संग्रामसिंग जागीच ठार झाला, याबाबत दीपक मोतीलाल राजपूत यांच्या फिर्यादीवरून तालुका पोलिस ठाण्यात गुन्हा नोंद करण्यात आला आहे. दरम्यान, घटनास्थळी तालुका पोलिस ठाण्याचे पोलिस निरीक्षक बबन जगताप तसेच सहायक पोलिस निरीक्षक अमोल पवार यांनी भेट दिली.
