गडचिरोली : वृत्तसंस्था
राज्यातील अनेक शहरात महसूल व पोलीस विभागात लाचखोरीचे जाळे वाढत असतांना आता वन विभागाच्या देखील एकाने लाच घेतल्याची घटना उघडकीस आली आहे. हि कारवाई गडचिरोली लाचलुचपत प्रतिबंधक विभागाने केली आहे.
मिळालेल्या माहितीनुसार, रस्ते बांधकामावरील पकडलेल्या वाहनांवर ठोठावलेला 72 लाखांचा दंड कमी करण्यासाठी 10 लाखांची लाच मागणाऱ्या वनपरिक्षेत्र अधिकाऱ्याला गडचिरोली लाचलुचपत प्रतिबंधक विभागाने रंगेहाथ अटक केली. गुरुवारी रात्री उशिरा प्रमोद आनंदराव जेणेकर असे लाच घेतलेल्या अधिकाऱ्याचे नाव असल्याचे एसीबीने नमूद केले.
प्रमोद जेणेकर आलापल्ली वनविभागांतर्गत येत असलेल्या पेरमिली येथे वनपरिक्षेत्र अधिकारी म्हणून कार्यरत होता. या कारवाईने वनविभागात एकच खळबळ उडाली आहे. तक्रारदार हा कंत्राटदार आहे. त्याचे पेरमीली वनपरिक्षेत्रात येत असलेल्या तुमरगुंडा ते कासमपल्लीपर्यंत रस्त्याचे काम सुरू होते. काही दिवसांपूर्वी या कामावरील वाहने वनपरिक्षेत्र अधिकारी प्रमोद जेणेकर यांनी पकडली होती. ती वाहने सोडण्यासाठी व आकारलेले 72 लाखांचा दंड कमी करण्यासाठी त्यांनी तब्बल 10 लाखांच्या लाचेची मागणी केली होती. तडजोड अंती 5 लाख रुपये देण्याचे ठरले होते. दरम्यान एसीबीने जेणेकर यास अटक केली आहे.
