जळगाव : प्रतिनिधी
शहरातील शिवाजीनगर स्मशानभूमी परिसरात गुप्ती घेऊन परिसरात दहशत माजविणाऱ्या मयूर प्रशांत पाटील (२१, रा. इदगाव ता. जळगाव) याला शहर पोलिसांनी कारवाई करत ताब्यात घेतले. ही कारवाई सोमवार, १ जानेवारी रोजी दुपारी साडेबारा वाजता करण्यात आली.तरुणाकडून लोखंडी गुप्ती हस्तगत केली असून, या प्रकरणी शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शिवाजीनगर स्मशानभूमी परिसरात एक तरुण हातात लोखंडी गुप्ती घेऊन परिसरात दहशत माजवत असल्याची गोपनीय माहिती शहर पोलिस ठाण्याचे पोलिस निरीक्षक अनिल भवारी यांना मिळाली. त्यानुसार त्यांनी पथकाला कारवाईच्या सूचना दिल्या. पथकाने शिवाजीनगर परिसरातील स्मशानभूमीजवळ कारवाई करत मयूर पाटील याला ताब्यात घेत त्याच्याजवळून लोखंडी गुप्ती हस्तगत केली आहे. याप्रकरणी पोकों रतन गिते यांनी शहर पोलिस ठाण्यात फिर्याद दिली. त्यावरून मयूर विरुद्ध गुन्हा दाखल करण्यात आला आहे. ही कारवाई पोहेकों प्रफुल्ल धांडे, पोलिस नाईक किशोर निकुंभ, पोकों तेजस मराठे, अमोल ठाकूर, रतन गिते आदींनी केली.
