जळगाव : प्रतिनिधी
यावल येथील भुसावळ मार्गावरील एका शेतातील बांधावर ५० वर्षीय प्रौढ व्यक्ति मृत अवस्थेत मिळाला असून विजेच्या धक्क्याने मृत्यू झाल्याचा अंदाज असून हे प्रौढ चोपडा तालुक्यातील अडावद येथील असल्याचे स्पष्ट झाले आहे.
मिळालेल्या माहितीनुसार, चोपडा तालुक्यातील अडावद येथील विशाल रमेश मेढे (वय ५०) असे मृत व्यक्तीचे नाव आहे. दरम्यान, यावल ते भुसावळ मार्गावरील रस्त्यावरील टेलीफोन एक्सचेंजच्या कार्यालयासमोर प्रशांत मुरलीधर महाजन यांच्या शेता (गट क्रमांक ७२४ /२) मध्ये पिकपेरणी केली आहे. डुक्कर व इतर मोकाट गुरांचा त्रास होत असल्याने शेतातील कम्पाउंडला बॅटरीने चालणाऱ्या झटका मशिनची तार लावली आहे.
या तारांमध्ये असलेल्या वीज प्रवाहाचा शॉक लागून विशाल मेढे यांचा मृत्यू झाल्याची प्राथमिक अंदाज सूत्रांनी व्यक्त केला आहे. दरम्यान, पोलीस उपनिरीक्षक राजेंद्र साळुंके यांच्यासह पोलीस पथक घटनास्थळी दाखल झाले असून या घटनेचा पंचनामा करण्यात येत आहे. दरम्यान, मृत व्यक्तिच्या खिशातून मिळालेल्या ओळखपत्रावरून ते अडावद येथील विशाल मेढे असल्याचे स्पष्ट झाले असून ते यावल कशासाठी आले होते, हे अद्याप कळू शकले नाही
