पाचोरा : प्रतिनिधी
तालुक्यातील काकणबर्डी येथील खंडेरायाच्या यात्रोत्सवात महिलेच्या छेडछाडप्रकरणी मारहाणीत तीनजण जखमी झाले आहेत. अद्याप पोलिसात गुन्हा दाखल झाला नाही.
मिळालेल्या माहितीनुसार, पाचोरा शहराजवळील ३ कि. मी. अंतरावरील काकणबर्डी या उंच टेकडीच्या ठिकाणी खंडेरायाचे जागृत मंदिर आहे. याठिकाणी खंडेरायाची यात्रा मोठ्या जल्लोषात भक्तीभावाने सुरू झाली. ‘येळकोट येळकोट जय मल्हार’च्या जयघोषात भंडारा उधळत भाविक भक्तांनी खंडेरायाचे दर्शन घेतले. या यात्रेत तरुण, तरुणी, स्त्री, पुरुष, नवीन विवाहित जोडपे यांनी भांडारा उधळत दर्शन घेतले.
दरम्यान, संध्याकाळी ५ वाजेच्या सुमारास एका तरुणाने महिलेकडे बघून अश्लील भाषा वापरली. त्यास महिलेच्या बहिणीच्या मुलाने हटकले असता त्या तरुणाने महिलेसह तिच्या बहिणीशी व मुलाशी वाद करून त्या तरुणाने मित्रांना फोन लावला. यावेळी साथीदारांनी महिलेसह तिच्या भावाला व भाच्याला मारहाण करून जखमी केले. यात विवेक सुरेश जाधव (२२, पाचोरा) शुभम दामू खरे (२३) व अश्विन इंदरसिंग पाटील (२१, दोघे वडगाव टेक) यांना मारहाण करीत गंभीर जखमी केले, महिलेसह तिच्या बहिणीला धक्काबुक्की करून छेडछाडीचा प्रकार केला. या घटनेची अद्याप गुन्हा नोंद झाली नसून जखमींवर खाजगी रुग्णालयात उपचारा सुरू आहेत.
