जामनेर : प्रतिनिधी
पहूरकडे भरधाव वेगाने निघालेल्या कंटेनरने समोरून येणाऱ्या चारचाकी वाहनाला जोरदार धडक दिली. यात चारचाकी वाहनातील चालकासह तिघे ठार झाले. यात पैठण येथील दोन जणांचा समावेश आहे. हा भीषण अपघात मुक्ताईनगर-छत्रपती संभाजीनगर महामार्गावर सोमवारी दुपारी चार वाजेच्या सुमारास घडला. यामध्ये अल्लाउद्दीन गयासोद्दीन शेख (४०), शेख समीर शेख नजीर (२०, दोघे रा. बालानगर, ता. पैठण) आणि वाहनचालक साजन जगन बडोले (२५ रा. खंडवा, मध्य प्रदेश) अशी मृतांची नावे आहेत.
मिळालेल्या माहितीनुसार, बालानगर येथून फळांच्या खरेदीसाठी खंडव्याकडे असतांना रात्री नातेवाईक जामनेरला पोहोचले. जामनेर येथील रेल्वे गेट व टाकळी गावाच्या मध्ये असलेल्या नागदेवता मंदिराजवळील वळणावर सोमवारी दुपारी चार वाजेच्या सुमारास हा भीषण अपघात झाला. अपघातानंतर टैंकर (क्र. आरजे ३२ जीसी ०७८९) वरील चालक फरार झाला.
अपघाताची माहिती मिळताच पोलिसांनी घटनास्थळी धाव घेतली. रुग्णवाहिकेसह जालमसिंग राजपूत यांनी अपघातस्थळी ग्रामस्थांच्या मदतीने वाहनातील दोघांचे मृतदेह व गंभीर जखमी असलेल्या एकाला तातडीने उपजिल्हा रुग्णालयात आणले. रुग्णालयात पोहोचेपर्यंत तिसऱ्या इसमाचा देखील मृत्यू झाला होता. वाहनातील तिघांचे मोबाइल चक्काचूर त्यातील झाल्याने पोलिसांनी सीमकार्ड काढून दुसऱ्या मोबाइलमध्ये टाकून नातेवाइकांशी संपर्क साधला. पोलिस उपनिरीक्षक जी. एम. अहिरे, सचिन सानप यांनी घटनास्थळावर पंचनामा केला.
