पुणे : वृत्तसंस्था
राज्यातील पुणे शहरात गेल्या काही महिन्यापासून गुन्हेगारी मोठ्या प्रमाणात वाढत आहे. आज पुन्हा एकदा शहरात कोयता गँगची दहशत पाहायला मिळाली असून नागरिकांमध्ये भितीचे वातावरण निर्माण झाले आहे. शहरातील एनडीए रस्त्यावर कोयता गँगने दहशत माजवल्याचा धक्कादायक प्रकार समोर आला आहे. परिसरातील एका – उपहारगृहात काम करणाऱ्या दोन कामगारांना टोळक्याने मारहाण केली.
याबाबत फिर्यादीने दिलेल्या माहितीनुसार, त्यांच्या उपहारगृहातील कामगार रुपेश आणि रमेश दुचाकीवरुन एनडीए रस्त्याने निघाले होते. यावेळी शिवणे परिसरात दोघांनी त्यांना अडवले आणि शिवीगाळ करण्यास सुरुवात केली. ‘मी या भागातील दादा आहे. बाजूला चल मी तुला दाखवितो..’ अशी धमकी या दोघांना दिली. तसेच एकाने त्याच्याकडील कोयता उगारुन मारहाण करण्यास सुरुवात केली. या प्रकरणी उत्तमनगर पोलीस ठाण्यात फिर्याद दाखल करण्यात आली. पोलिसांनी अधिक तपास करत तिघांना अटक केली आहे.
प्रसन्न उर्फ बाळा मनोज कदम (वय २३, रा. शांतीबन सोसायटी, शिवणे), आदित्य उद्धव पांचाळ (वय १९, रा. राहुलनगर, शिवणे), सनी रामप्रताप गुप्ता (वय २१, रा. समर्थ आंगण सोसायटी, शिवणे) अशी अटक करण्यात आलेल्यांची नावे आहेत. दरम्यान, शहरात वारंवार अशा प्रकारच्या घटना घडत असल्याने नागरिकांमध्ये भितीचे वातावरण आहे.
