यावल : प्रतिनिधी
शहरातील एका शाळेच्या गेटजवळ अल्पवयीन विद्यार्थिनीची एकाने छेड काढली. यासंदर्भात जाब विचारणाऱ्या मुलीच्या भावाला छेड काढणारा तरुण तसेच त्याच्या दोन मित्रांनी बेदम मारहाण केली. ही घटना बुधवारी दि.१३ घडली. यानंतर हे तिघे तरुण घटनास्थळावरून पसार झाले.
मिळालेल्या माहितीनुसार, १३ डिसेंबर बुधवार रोजी सकाळी साडेदहा वाजेच्या दहावीची अल्पवयीन विद्यार्थिनी साने गुरुजी माध्यमिक व उच्च माध्यमिक विद्यालयात जात असताना विद्यालयासमोर मोटारसायकलवर आलेल्या एका तरुणाने तिच्या समोर मोटारसायकल आडवी करून तिला रोखले. हे कळताच मुलीचा भाऊ घटनास्थळी आला व त्या तरुणास जाब विचारला असता मोटारसायकलवर मागे बसलेल्या त्या तरुणाच्या दोघा मित्रांनीही मुलीच्या भावाला मारहाण केली. याबाबत या तिघांविरुद्ध पोस्कोअंतर्गत गुन्हा दाखल केला आहे. पुढील तपास पोलिस निरीक्षक राकेश मानगावकर यांच्या मार्गदर्शनाखाली सुरू आहे.
