जळगाव : प्रतिनिधी
पाकिस्तानच्या गुप्तचर विभागाला देशातील प्रतिबंधित क्षेत्रातील गोपनीय व संवेदनशील माहिती तेथील हस्तकाला देणाऱ्या तरुणाला राज्य दहशतवाद विरोधी पथकाने (एटीएस) अटक केली आहे. गौरव पाटील (२३) असे अटक करण्यात आलेल्या तरुणाचे नाव आहे; तो मूळ जळगाव येथील असून त्याने मुंबईच्या नेव्हल डॉक यार्डमध्ये सहा महिन्यांचे शिकाऊ शिक्षण घेतले होते.
मिळालेल्या माहितीनुसार, ठाण्यातील एक संशयित पाकिस्तानातील गुप्तचर विभागातील हस्तकाला भारतातील प्रतिबंधित क्षेत्रातील गोपनीय व संवेदनशील माहिती देत असल्याची माहिती दहशतवाद विरोधी पथकाला मिळाली होती. त्यानुसार पथकाने तपास सुरू केला. तांत्रिक पुराव्याच्या मदतीने पाटीलला ताब्यात घेत चौकशी केली. तेव्हा, एप्रिल ते ऑक्टोबर २०२३ या कालावधीत फेसबुक व व्हॉट्सअॅपद्वारे पाकिस्तानातील दोन हस्तकांशी ओळख झाली होती. याच ओळखीतून त्याने गोपनीय व संवेदनशील माहित पुरवली.
या माहितीच्या बदल्यात त्याने पैसे स्वीकारल्याचे तपासात समोर आले. त्यानुसार, पाटीलसह त्याच्या संपर्कात असलेल्या तिघांविरोधात एकूण चार जणांविरुद्ध यूएपीए कायद्यांतर्गत गुन्हा दाखल करण्यात आला आहे. यामध्ये दोन पाकिस्तानी नागरिकांचा समावेश आहे. तिसऱ्या व्यक्त्तीबाबत अधिक तपास सुरू आहे. पाटीलला अटक करण्यात आली आहे.
