नाशिक : प्रतिनिधी
जिल्ह्यातील सामनगाव रोड भागात कार अडवून टोळक्याने एकास बेदम मारहाण केल्याची घटना घडली. या घटनेत टोळक्याने वाहनाचे नुकसान करीत जखमी युवकाचा मोबाईल व रोकड पळविली असून, याप्रकरणी नाशिकरोड पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, सचिन जगताप,रोशन ढोकणे,प्रविण जगताप,राहूल जगताप व अन्य दोन अनोळखी तरूण अशी संशयितांची नावे आहेत. याबाबत विजय भरत धिवर (२५ रा.गोरेवाडी जेलरोड) या युवकाने तक्रार दाखल केली आहे. धिवर शनिवारी (दि.९) रात्री सामनगाव रोडने आपल्या कारमधून प्रवास करीत असतांना ही घटना घडली.
संजीवणी हॉस्पिटल भागात टोळक्याने त्यांची कार अडवून सचिन जगताप यास का मारहाण केली याबाबत जाब विचारला. धिवर हे त्यांना समजून सांगण्याचा प्रयत्न करीत असतांना संशयितानी कारची तोडफोड करीत त्यांना लाथाबुक्यांनी बेदम मारहाण केली. या घटनेत टोळक्याने धिवर यांच्या खिशातील मोबाईल व रोकड पळविली असून अधिक तपास उपनिरीक्षक गोसावी करीत आहेत.
