नवी दिल्ली : वृत्तसंस्था
देशभरात राजस्थानातील राष्ट्रीय राजपूत करणी सेनेचे अध्यक्ष सुखदेव सिंह गोगामेडी यांच्या हत्येनंतर देशातील वातावरण तापले होते. आता याप्रकरणी पोलिसांनी तीन आरोपींना चंदिगड येथून अटक केली. तिघेही चंदिगड सेक्टर 22 ए येथे लपून बसले होते. दिल्ली पोलिसांची गुन्हे शाखा आणि राजस्थान पोलीस यांनी संयुक्त कारवाई करत तिघांनाही पकडले. रोहित राठोड, नितीन फौजी, आणि उधम अशी तिघांची नावे आहेत.
तिघांना दिल्ली पोलिसांच्या गुन्हे शाखेतील कार्यालयात आणण्यात आले. त्यानंतर जयपूरला नेण्यात आले. याआधी जयपूर पोलिसांनी शूटर्सची मदत करणाऱया रामवीरला अटक केली होती. तिघांमधील एक रोहित राठोड (गोदारा) हा गँगस्टर लॉरेन्स विष्णई गँगचा असून त्याने गोगामेडी यांच्या हत्येची जबाबदारी घेतली होती. पोलिसांनी त्याच्यावर एक लाख रुपयांचे बक्षीस जाहीर केले होते. गोदारा 2022 मध्ये बनावट पासपोर्टद्वारे देश सोडून पळाला होता.
तिघेही नाव बदलून गेस्ट हाऊसमध्ये लपून बसले होते. दविंदर कुमार, जयवीर सिंग आणि सुखबीर सिंग अशी नावे त्यांनी धारण केली होती तसेच बनावट आधार कार्डही दिले होते. गोगामेडी यांच्या हत्येनंतर शूटर नितीन फौजी आणि रोहित ठाकूर राजस्थानच्या दिडवाना येथून चुरू-दिल्ली रोडवेज बसमध्ये चढले. राष्ट्रीय महामार्गावरील रेवाडीच्या धरुहेरा गावात सकाळी उतरले. त्यानंतर वाहनाने ते रेवाडी रेल्वे स्थानकावर पोहोचले. येथून त्यांनी ट्रेनने हिस्सार गाठले. हिस्सारमधील सीसीटीव्ही फुटेजमध्ये ते आढळून आले. पोलिसांनी त्या दिशेने तपास करत मोबाईलद्वारे लोकेशन मिळवून चंदिगड येथून तिघांनाही ताब्यात घेतले.
