पहूर : प्रतिनिधी
सायकलस्वार वडील व मुलीस ट्रकने जोरदार धडक दिली. यात मुलगी जागीच ठार, तर वडील जखमी झाले. ही हृदयद्रावक घटना शुक्रवारी सकाळी सात वाजता पहूर-छ. संभाजीनगर महामार्गावरील बांधकाम सुरू असलेल्या पुलाजवळ घडली.
मिळालेल्या माहितीनुसार, मृत ज्ञानेश्वरी शंकर भामेरे (११) ही पाचवीतील विद्यार्थिनी शुक्रवारी होणाऱ्या कुमार साहित्य संमेलनात निवड प्रक्रियेसाठी शाळेकडून पत्र घेऊन जळगावाला येणार होती. त्याआधीच हा अपघात घडला. पहूर कसबेतील रहिवासी पत्रकार व शिक्षक शंकर भामेरे (४०) व कन्या ज्ञानेश्वरी हे सकाळी सात वाजता शाळेत जाण्यासाठी सायकलने निघाले. छ. संभाजीनगर-जळगाव राष्ट्रीय महामार्गावरील वाघूर नदीवरील अर्धवट पुलाच्या कामाच्या ठिकाणी मागून आलेल्या ट्रकने सायकलला जबर धडक दिली. यात शंकर भामेरे किरकोळ जखमी झाले, तर ज्ञानेश्वरी हिचा जागीच मृत्यू झाला. वाहनचालक सुनील ज्ञानदेव सोनवणे (रा. अंजनवती, जि. बीड) याच्याविरुद्ध गुन्हा दाखल करून त्यास अटक करण्यात आली आहे
