धरणगाव : प्रतिनिधी
तालुक्यातील नांदेड येतील गुरे चारण्यासाठी तापी काठच्या शेत शिवाराकडे दि.६ रोजी गेलेल्या एकावर आगेमोहळाच्या मधमाश्यांनी हल्ला केला. गंभीररीत्या चावे घेतल्याने त्याचा मृत्यू झाला. सुकदेव धनसिंग कोळी (४८) असे मृताचे नाव आहे.
मिळालेल्या माहितीनुसार, तापी नदीकाठालगतच्या शेतशिवाराकडे सुकदेव हा गुरुवारी गुरे चारण्यासाठी गेला होता. गुरे चरत असताना अचानक आगेमोहळाच्या मधमाश्यांनी त्याच्यावर हल्ला केला. मधमाश्यांनी त्याच्या संपूर्ण चेहऱ्यासह हातापायांवर कडाडून चावा घेतला. त्यात तो गंभीर जखमी झाला. ही घटना दुपारी घडली. जखमी अवस्थेत तो तेथेच पडून होता. सायंकाळी तो घरी न परतल्याने त्याचे नातलग व घराजवळील काही लोक शोध घेण्यासाठी गेले असता तो अत्यवस्थ स्थितीत तेथेच पडून असल्याने दिसून आले. घरी आणून त्याच्यावर खासगी डॉक्टरांद्वारे प्राथमिक उपचार करून पुढील उपचारासाठी चोपडा उपजिल्हा रुग्णालयात नेण्यात आले. परंतु उपचार सुरू असताना त्याचा रात्री मृत्यू झाला. याबाबत चोपडा पोलिस स्टेशनला अकस्मात मृत्यूची नोंद दाखल होऊन ती धरणगाव पोलिस स्टेशनकडे वर्ग करण्यात आली आहे.
