धुळे : वृत्तसंस्था
राज्यातील अनेक जिल्ह्यात धक्कादायक घटना घडत असतांना अशीच घटना धुळे शहरातून समोर आली आहे. एका ४ वर्षीय भाच्याची एका मामाने हत्या केल्याची घटना घडली असून याप्रकरणी पोलिसात गुन्हा देखील दाखल करण्यात आला आहे.
मिळालेल्या माहितीनुसार, चिमुकला घराबाहेर अंगणात खेळत होता. मात्र, काही वेळेनंतर घरातील सदस्यांना दिसलाच नाही. त्यामुळे घरातील सदस्यांनी त्याची शोधाशोध सुरु केली. त्यावेळी चिमुकला बाहेर कुठेही सापडला नाही. त्यामुळे घरातील लोकांनी शेजारीच असलेल्या बाथरूममध्ये पाहणी केली. त्यावेळी या चिमुकल्याच्या मामा त्याला पाण्याच्या टाकीत बुडवून शेजारी बसल्याचा आढळून आला. या घटनेनंतर नातेवाईकांनी तातडीने चिमुकल्याला रुग्णालयात उपचारासाठी दाखल केले. मात्र, उपचारादरम्यान डॉक्टरांनी चिमुकल्यास मृत घोषित केले. हि धक्कादायक घटना धुळ्यात घडली आहे.
मामानेच अशा प्रकारचे कृत्य का केले, याबाबत सध्या परिसरात संभ्रमाचे वातावरण निर्माण झालं आहे. या विचित्र घटनेनंतर खळबळ उडाली आहे. चाळीसगाव रोड पोलीस ठाण्याच्या पोलीस अधिकाऱ्यांनी संबंधित मामाच्या विरोधामध्ये खुनाचा गुन्हा दाखल केला आहे. तसेच पोलिसांनी आरोपीला ताब्यात देखील घेतलं आहे.या मामाने अशा प्रकारचे कृत्य का केले, याचा तपास चाळीसगाव रोड पोलीस करीत आहेत.
