धुळे : प्रतिनिधी
राज्यातील अनेक जिल्ह्यात सुरु असलेल्या बेकायदेशीर दारू पुन्हा एकदा चव्हाट्यावर आलेली असतांना यावर आता कारवाई झाली आहे. मध्यप्रदेशकडून शिरपूर तालुक्यातील बोराडी येथे अवैधपणे वाहतूक होत असलेल्या दारू साठ्यावर शिरपूर पोलिसांनी कारवाई करत दारूने भरलेला ट्रक पोलिसांनी जप्त केला आहे.
मिळालेल्या माहितीनुसार, शिरपूर पोलिसांना गुप्त माहिती दारामार्फत मिळालेल्या माहितीनुसार मध्यप्रदेशकडून अवैधपणे वाहतूक करत मोठ्या प्रमाणात दारू साठा भरलेला ट्रक शिरपूरच्या दिशेने येत असल्याची माहिती मिळाली होती. या माहितीच्या आधारे शिरपूर पोलिसांनी बोराडी परिसरामध्ये सापळा रचला असता त्या ठिकाणी संबंधित ट्रक पोलिसांना आढळून आला. ट्रक चालकाने पोलिसांना दुरूनच बघून ट्रक सोडून धुम ठोकली. या ट्रकची तपासणी केली असता त्यामध्ये मोठ्या प्रमाणात दारूचा साठा पोलिसांना आढळून आला. कारवाईदरम्यान पोलिसांनी विविध नामांकित कंपन्यांचे दारूचे बॉक्स या ट्रकमधून हस्तगत केले असून, जवळपास या ट्रकमध्ये ४९ लाखांहून अधिकचा दारू साठा पोलिसांच्या हाती लागला आहे. या कारवाईत जवळपास ८० लाखांहून अधिकचा मुद्देमाल पोलिसांनी हस्तगत केला असून पुढील तपास शिरपूर पोलीस करीत आहेत.
