नवी दिल्ली : वृत्तसंस्था
देशातील राजस्थान राज्यात विधानसभा निवडणुकीचे निकाल हाती लागले असून दर पाच वर्षांनी सरकार बदलण्याचा ट्रेंड आता राजस्थानात कायम दिसला आहे. यंदा विधानसभा निवडणुकीत भाजपची बहुमताच्या दिशेने वाटचाल होताना दिसत आहे. निवडणूक आयोगाच्या म्हणण्यानुसार, भाजप 105 जागांवर आणि काँग्रेस 73 जागांवर पुढे आहे, तर इतर उमेदवार 14 जागांवर पुढे आहेत. आतापर्यंत भाजपने 12, काँग्रेसने 3, भारतीय आदिवासी पक्षाने एक आणि इतरांना एक जागा जिंकली आहे.
दरम्यान, काँग्रेसने आपला पराभव मान्य केला आहे. मुख्यमंत्री अशोक गहलोत आज संध्याकाळी राजभवनात जाऊन राजीनामा देणार आहेत. विधानसभा अध्यक्ष डॉ.सी.पी.जोशी यांचा पराभव झाला आहे. त्यामुळे परसादीलाल मीना, प्रताप सिंह खाचरियासह काँग्रेसच्या 25 पैकी 17 मंत्र्यांना पराभव पत्करावा लागला आहे. शांती धारिवाल विजयी झाले आहेत. विरोधी पक्षनेते राजेंद्र राठोड आणि विरोधी पक्ष उपनेते सतीश पुनिया यांचा पराभव झाला आहे. भाजपने निवडणूक लढविलेल्या 7 खासदारांपैकी 4 आघाडीवर आहेत आणि 3 मागे आहेत आणि दोन्ही खासदार तिसऱ्या क्रमांकावर आहेत. यावेळी जनतेने पुन्हा सरकार बदलले, पण विधानसभेच्या अध्यक्षांसह विरोधी पक्षनेते आणि उपनेते हे दोघेही पराभूत झाले हाही योगायोग आहे.
