जळगाव : प्रतिनिधी
नाशिक येथे पतीवर उपचार करून रावेर येथे गावी परतत असताना कार खांबावर धडकल्याने सावित्री सुनील हसकर (५०, रा. रावेर) या जागीच ठार झाल्या. या अपघातात तीन जण जखमी झाले आहेत. हा अपघात शनिवार, २ डिसेंबर रोजी पहाटे राष्ट्रीय महामार्ग क्रमांक सहावर जळगाव ते नशिराबाद दरम्यान टोल नाक्यानजीक झाला.
मिळालेल्या माहितीनुसार, पोलिस भरतीचे प्रशिक्षण देणारे सुनील हसकर यांच्यावर नाशिक येथे उपचार सुरू आहेत त्यासाठी ते अधून-मधून तेथे जात असतात. शुक्रवारी उपचार घेऊन रात्री नाशिक येथून रावेर येथे ते कारने परतत होते. यावेळी त्यांच्यासोबत त्यांच्या पत्नी सावित्री हसकर, अन्य एक महिला व मित्र होते. कार नशिराबाद टोलनाक्यानजीक पोहोचली. त्यावेळी ती एका खांबावर धडकली. त्यात सावित्री हसकर या जागीच ठार झाल्या. तसेच चालकाचा हात व पाय फ्रैक्चर झाला आहे तर अन्य दोघांनाही मार लागला आहे. मयत महिलेच्या पश्चात पती, तीन मुले, दोन मुली असा परिवार आहे.
