चोपडा : प्रतिनिधी
चोपडा शहरात पशुधनाची अवैध वाहतूक करणाऱ्यांवर कारवाई केल्याने १० ते १५ जणांनी चोपडा येथील सपोनि अजित सावळे, हेकॉ संतोष पारधी यांना मारहाण करून ठार मारण्याची धमकी दिली. ही घटना जुन्या यावल रोडवर शुक्रवारी रात्री ११ वाजेच्या सुमारास घडली. याप्रकरणी सात जणांना अटक करण्यात आली आहे.
मिळालेल्या माहितीनुसार, पशुधनाची अवैध वाहतूक करणाऱ्यांवर पोलिसांनी शुक्रवारी कारवाई केली होती. यानंतर साने गुरुजी वसाहतीमधील १० ते १५ जण पोलिस ठाण्यात आले. कारवाई केल्याबाबत विचारणा करू लागले. पोलिसांनी त्यांना तिथून हाकलून लावले. यानंतर सावळे व पारधी हे रात्री ११ वाजता पेट्रोलिंग करीत असताना यावल रोडवर उभ्या असलेल्या जमावाने त्यांना अडवले तसेच लोखंडी पट्ट्याने सावळे यांना जबर मारहाण केली तर पारधी यांची कॉलर पकडून शिवीगाळ करत त्यांनाही जिवे मारण्याची धमकी दिली.
या प्रकरणी चोपडा शहर पोलिसांत गुन्हा दाखल करण्यात आला आहे. यापैकी सात जणांना रात्रीच पोलिसांनी अटक केली. फरार असलेल्या इतरांचा शोध घेतला जात आहे. अधिक तपास पो.नि. के. के. पाटील यांच्या मार्गदर्शनाखाली घनःश्याम तांबे करीत आहेत. अजित सावळे यांना चोपडा येथे खासगी रुग्णालयात दाखल करण्यात आले आहे.
जमावाने केलेल्या हल्ल्यात सपोनि अजित सावळे यांच्या कानाला अंतर्गत दुखापत झाली असून, डाव्या हाताला जबर मार लागला आहे. याप्रकरणी १० आरोपी निष्पन्न झाले आहेत. त्यातील सात आरोपींना अटक करण्यात आली आहे. यात शेख सऊद शेख सलीम कुरेशी (२४), शेख सलीम ऊर्फ टेन्शन शेख उमर कुरेशी (५७), जियाउद्दीन गया सुदिन काझी (४३), शेख इब्राहिम शेख हमीद कुरेशी (५०), शेख नाझीम शेख युनूस शोएब सलीम कुरेशी (४२), शेख मंजूर शेख मकसूद (२४), मजहर सय्यद जहांगीर (२४) यांचा समावेश आहे. त्यांना दोन दिवसांची पोलिस कोठडी सुनावण्यात आली आहे.
