जळगाव – प्रेमासाठी काही पण करणारी आजची तरुणाईचे प्रताप दिवसेंदिवसमोर उघडत आहे. यातच धुळे जिल्ह्यातील साक्री शहरात दरोडा व अपहरणाची 25 रोजी शनिवारच्या रात्री घटना घडली होती. या प्रकरणात पोलीस तपास करत असताना मिळत गेलेल्या माहिती नुसार प्रकरण उघडकीस आली अन् पोलिसांसह सर्वच जण चक्रावून गेले. यात संशयित तरुणी निशा मोठाभाऊ शेवाळे (वय २३) हिनेच दरोडा व स्वतःच्या अपहरणाचे नाट्य रचल्याचा धक्कादायक प्रकार समोर आला आहे.
या प्रकरणी आरोपी विनोद भरत नाशिककर (वय ३८, रा. गायत्रीनगर, शाजापूर, मध्य प्रदेश) व रोहित संजय गवळी (वय २२, रा. मोगलाई, धुळे) यांना मध्य प्रदेशातून ताब्यात घेत अटक करण्यात आली आहे. दरम्यान, तरुणीवर साक्रीतील एका खासगी रुग्णालयात उपचार सुरू आहेत. तिची प्रकृती ठीक झाल्यानंतर तिला चौकशीसाठी ताब्यात घेतले जाईल, अशी माहिती पोलिस निरीक्षक मोतीराम निकम यांनी दिली. या प्रकरणातील चार संशयित फरार आहेत.
असा शिजला अपहरणाचा डाव
वडिलांच्या समोरून तरुणीला पळून जाणे शक्य नव्हते. त्यामुळे मुलीच्या आत्याच्या घरून दरोडा व अपहरण करण्याचा कट रचला गेला. ठरल्यानुसार तरुणी सरस्वतीनगरातील आपल्या आत्याच्या घरी तात्पुरत्या स्वरूपात राहण्यास गेली. विनोदने आपल्या हरीयाणातील चार साथीदारांसह दरोड्यासाठी लागणारी वस्तू व वाहन तयार केली. यानंतर रायपूरबारी गाठत विनोद आणि तरुणी एका वाहनाने शाजापूर तर त्यांचे इतर साथीदार रतलामकडे रवाना झाले.
