एरंडोल : प्रतिनिधी
एका तरुण खासगी वाहन चालकाने आपल्या वाहनाच्या कॅरीला दोर बांधून गळफास घेतल्याची घटना मंगळवारी रात्री घडली.
मिळालेल्या माहितीनुसार, राष्ट्रीय महामार्ग क्र. ६ वरील भवानी हॉटेलसमोरील महावितरण कार्यालयाकडे जाणाऱ्या रस्त्यावर एरंडोल वृंदावननगर येथील रहिवासी योगेश शांताराम देशमुख (३४) या तरुणाने त्याच्या स्वतःच्या मालकीची टाटा मॅजिक गाडीवरील कॅरीला दोर बांधून गळफास घेतला. योगेश देशमुख हा खासगी वाहनचालक असून, त्याने घर बांधण्यासाठी कर्ज घेतले होते. त्यातच शासनाने एस. टी. मध्ये महिलांना सवलत जाहीर केल्याने खासगी वाहन चालविणे जिकरीचे झाले होते. त्यामुळे तो कर्ज फेडू शकत नव्हता. या विवंचनेत असल्याची चर्चा सुरू आहे. योगेश हा अविवाहित होता. त्याच्या पश्चात वडील, बहीण असा परिवार आहे. दरम्यान, एरंडोल पोलिस ठाण्यात विकास वसंत देशमुख यांनी दिलेल्या फिर्यादीनुसार आकस्मिक मृत्यूची नोंद करण्यात आली आहे. पोलिस निरीक्षक सतीश गोराडे यांच्या मार्गदर्शनाखाली महेंद्र पाटील, विलास पाटील, जुबेर खाटीक, रवींद्र ताडे हे तपास करत आहेत.
