धरणगाव : प्रतिनिधी
युवतीच्या दुचाकीला बसचा कट लागल्याने बस गावात आल्यानंतर दोघांनी बसचालकास लाथाबुक्क्यांसह चापटांनी बेदम मारहाण केल्याची घटना २७ च्या सायंकाळी नांदेड येथे गावठाण चौकात घडली. दरम्यान, बसचालकाची प्रकृती गंभीर आहे.
मिळालेल्या माहितीनुसार, जळगावहून नांदेडला सायंकाळी चार वाजता येणारी बस (एमएच-१४/बीटी-३०१९) ही चार वाजेच्या सुमारास नांदेडला आल्यानंतर नारणे गावाकडे जाते. ही बस नारण्याहून नांदेडकडे येत असताना नम्रता महेंद्र पाटील (२०) हिच्या दुचाकीला बसने कट मारला. त्यामुळे दुचाकी घसरली व नम्रता पाटील हिच्या पायाला किरकोळ दुखापत झाली. बस गावात आल्यानंतर मुलीच्या नातेवाइकांनी बसचालक तुकाराम आनंदराव रायसिंग (४६, बांभोरी) यांना बेदम मारहाण केलीबसचालक गंभीर अवस्थेतच साडेचार वाजेपासून सायंकाळच्या साडेसहा वाजेपर्यंत बसच्या सीटवर पडून होते. दरम्यान, ही घटना नांदेड येथील रहिवासी व गोंदिया पोलिस स्टेशनचे पोलिस उपनिरीक्षक शरद सैंदाणे हे गावी सुटीवर आले असल्याने त्यांना समजताच त्यांनी स्वतःच्या वाहनातून बसचालकास धरणगाव ग्रामीण रुग्णालयात दाखल केले. त्यानंतर त्यांना पुढील उपचारासाठी जळगाव येथे हलविण्यात आले आहे.
बसचालकास बेदम मारहाण झाल्याची घटना गावात समजल्यानंतर गावठाण चौकात मोठ्या प्रमाणात गर्दी झाली होती. घटनास्थळी सहायक पोलिस उपनिरीक्षक करीम सैयद यांच्यासह पोलिसांनी भेट देऊन पाहणी केली. नम्रता महेंद्र पाटील (२०) हिच्या फिर्यादीवरून पोलिसात तुकाराम रायसिंग यांच्याविरोधात तक्रार दाखल करण्यात आली आहे.
