धरणगाव : प्रतिनिधी
शहरात गुरुवारी मध्यरात्रीनंतर ट्रक चालकाला चाकूचा धाक दाखवून त्यातील डिझेल चोरणाऱ्या टोळीतील एकाला पोलिसांनी पाठलाग करून अटक केली आहे. तर तीन जण फरार झाले. त्यात एक कार आणि १२० लीटर डिझेल जप्त करण्यात आले आहे.
मिळालेल्या माहितीनुसार, धरणगाव येथील आयटीआयजवळ रात्री दोन ट्रक चालक थांबले होते. पहाटे ३ वाजेच्या सुमारास धुळे येथील चार जण कारने आले. त्यांनी त्या ट्रकचालकांच्या गळ्याला चाकू लावला आणि ट्रकमधून डिझेल चोरी करण्यास सुरुवात केली.त्याच वेळी गस्तीवर असलेले पोलिस निरीक्षक उद्धव डमाळे हे तेथे पोहोचले. त्यांनी त्या आरोपींना हटकण्याचा प्रयत्न केला. मात्र, चोरांनी चोपडा रस्त्याकडे पळ काढला. पोलिसांनी १२ किमी पाठलाग करून त्यांची कार अडवली. त्यातील तीन जण फरार झाले. पोलिसांनी प्रशांत नवनाथ देवकाते (वय २७) याला घटनास्थळावरून ताब्यात घेतले. तसेच कार क्रमांक एमएच १५ एक्स ४६३७ जप्त केली. त्यातून १२० लिटर डिझेलही ताब्यात घेतले आहे. या प्रकरणी शिवेंद्र सिंह आदिराम धाकड (रा. राणीपुरा, मध्य प्रदेश) यांनी फिर्याद दिली.
