धरणगाव : प्रतिनिधी
तालुक्यातील धरणगाव- चोपडा मार्गावर भरधाव वेगाने येणाऱ्या मालवाहू ट्रकने समोरून धडक दिल्याने दुचाकीस्वाराचा मृत्यू झाला. ही घटना निशाणे फाट्यालगत गुरुवारी सकाळी घडली.
मिळालेल्या माहितीनुसार, नांदेड येथील सागर छगन कोळी (२८) हा गुरुवारी सकाळी दुचाकीने (एमपी-४६/ओ३१६) धरणगावकडे जात असताना धरणगावकडून भरधाव येणाऱ्या अज्ञात मालवाहू ट्रकने जोरदार धडक दिली. अपघातात जखमी झालेल्या सागरचा उपचारासाठी रुग्णालयात घेऊन जात असताना मृत्यू झाला. अपघातानंतर ट्रकचालक ट्रकसह घटनास्थळावरून फरार झाला आहे.
ट्रकचालकाने ट्रक निशाणे गावाकडे वळवून मधल्या मार्गाने धरणगावकडे ट्रकसह पलायन केल्याचे निशाणे गावालगत महालक्ष्मी मंदिराजवळील सीसीटीव्हीच्या फुटेजमध्ये दिसून येते आहे. मयत सागर कोळी याच्या घरची परिस्थिती अतिशय गरिबीची असून तो अविवाहित होता. त्याचे कुटुंब मोलमजुरी करून उदरनिर्वाह करत होते. पश्चात आई वडील, बहीण व भाऊ असा परिवार आहे. धरणगाव पोलिसात अज्ञात ट्रकचालकाविरुद्ध भा.दं. वि. कलम ३०४ (अ) अन्वये गुन्ह्याची नोंद करण्यात आली आहे. तपास पो. नि. उद्धव डमाळे यांच्या मार्गदर्शनाखाली हे. कॉ. प्रदीप पवार हे करीत आहेत.
