मुंबई : वृत्तसंस्था
आईने आपल्या १७ वर्षीय मुलाची आजीकडे तो अभ्यास करत नाही, सारखा बाहेर फिरतो, अशी तक्रार केली. त्याचा राग आल्याने मुलाने १६ व्या मजल्यावरून खाली उडी मारून आत्महत्या केल्याची घटना मीरा रोड येथे घडली. इतक्या उंचीवरून तो खाली पडल्याने त्याचा जागीच मृत्यू झाला. तो कांदिवलीच्या ठाकूर महाविद्यालयात अकरावीत शिकत होता. या घटनेने परिसरात हळहळ व्यक्त होत आहे.
मिळालेल्या माहितीनुसार, येथील जे. पी. नॉर्थ गार्डनमध्ये १६ व्या मजल्यावर मोहम्मद शादाब चौधरी हे पत्नी, १७ वर्षांचा मुलगा अयान व त्याच्यापेक्षा लहान असलेल्या दोन मुलींसह राहतात. अयान हा अभ्यास करत नाही, बाहेर फिरत असतो म्हणून त्याची आई त्याला समजावत असे. सोमवारी दुपारी आईने स्वतःच्या सासूला अर्थात अयानच्या आजीला कॉल केला होता. अयान हा अभ्यास करत नाही, नाहक बाहेर फिरत असतो, असे आजीला सांगितले. आपल्याबद्दल आजीकडे तक्रार केल्याचा राग आल्याने अयान याने रागाच्या भरात हॉलमधील ग्रिल नसलेल्या उघड्या बाल्कनीमधून खाली उडी मारली. काशीमीरा पोलिसांनी अकस्मात मृत्यू म्हणून नोंद केली आहे.
