भुसावळ : प्रतिनिधी
स्टेट बँकेच्या रावेर शाखेतून सावदा शाखेत हस्तांतरण करण्यासाठी वेंडर कडून अर्ज लिहून घेण्यासाठी आलेल्या भुसावळ येथील एका व्यक्तीचा येथील पोलीस ठाण्याजवळ हृदयविकारामुळे मृत्यू झाल्याची घटना आज दुपारी घडली. याबाबत रावेर पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, भुसावळ येथील मनोज किसन बोयत (वय ५५) हे रावेर शाखेतून सावदा स्टेट बँकेच्या शाखेत हस्तांतरण करण्यासाठी येथील पोलीस ठाण्याजवळ असलेल्या ईस्माईल तडवी यांच्याकडे अर्ज लिहून घेण्यासाठी दुपारी २ वाजता आले होते. याच वेळी ते खाली कोसळले. त्यानंतर त्यांना येथील ग्रामीण रुग्णालयात उपचारार्थ दाखल करण्यात आले. मात्र तपासणीनंतर वैद्यकीय अधिकाऱ्यांनी बोयत यांना मृत घोषित केले. याबाबत तडवी यांनी रावेर पोलीस ठाण्यात दिलेल्या माहितीवरून अकस्मात मृत्यूची नोंद करण्यात आली आहे. तपास पोलीस नाईक सुरेश मेंढे करत आहेत.
