यवतमाळ : वृत्तसंस्था
जिल्ह्यातील हिवरी येथील आर्णी मार्गावर मनदेवजवळ असलेल्या जेतवन पर्यटनस्थळी शनिवारी सायंकाळी ५:३० वाजता दोन बहिणींचा परिसरातील तलावात बुडून मृत्यू झाला. यात रिया किशोर बिहाडे (१२, रा. महागाव कसबा) व काव्या धम्मपाल भगत (११, रा. मंगरूळपीर, जि. वाशिम) अशी या मुलींची नावे आहेत. रिया ही काव्याची आतेबहीण आहे.
मिळालेल्या माहितीनुसार, काव्या मामा किशोर बिहाडे यांच्याकडे सुटीत आली होती. आई व मामा यांच्यासोबत ती जेतवन पर्यटनस्थळी आली. येथील ध्यान केंद्रात सर्व कुटुंबीय बसलेले असताना दोन चिमुकल्या बाहेरच्या परिसरात खेळत होत्या. अचानक त्या तलावात पडल्या. हीबाब लक्षात येताच बाहेर दोघींनाही तातडीने काढून यवतमाळच्या शासकीय रुग्णालयात आणण्यात आले. तेथे डॉक्टरांनी त्यांना मृत घोषित केले.
