पुणे : वृत्तसंस्था
पुणे शहरात अनेक तरुणीसह अल्पवयीन मुलीवर अत्याचाराच्या घटना घडत असतांना एका महिलेला रेशनचा तांदूळ देण्याच्या बहाण्याने विश्रांतवाडी येथील गोडाऊनमध्ये नेऊन तिच्यासमोर अश्लील वर्तन करुन विनयभंग केल्याची घटना घडली आहे. ही घटना शुक्रवारी दि.१७ सायंकाळी पाच वाजण्याच्या सुमारास विश्रांतवाडी येथील पोरावाल रोडवरील गोडाऊनमध्ये घडली आहे. याबाबत खडकी येथे राहणाऱ्या 45 वर्षाच्या महिलेने विश्रांतवाडी पोलीस ठाण्यात फिर्याद दिली आहे. यावरून गोविंदसिंग रंधवा (वय-60 रा. संगमवाडी झोपडपट्टी) याच्यावर आयपीसी 354 अ, 342 नुसार गुन्हा दाखल केला आहे.
दिलेल्या माहितीनुसार, आरोपी आणि फिर्यादी हे एकमेकांच्या ओळखीचे आहेत. आरोपीने फिर्यादी यांना लॅबरॉडर श्वानासाठी रेशनचा तांदूळ देतो असे सांगून त्याच्या दुचाकीवरुन विश्रांतवाडी येथील पोरवाल रोडवरील गोडाऊन मध्ये नेले. त्याठिकाणी अंगावरील कपडे काढत अश्लील बोलून विनयभंग केल्याचे फिर्यादीत नमूद केले आहे. याबाबत महिलेने तक्रार देताच विश्रांतवाडी पोलिसांनी आरोपीविरुद्ध विनयभंगाचा गुन्हा दाखल केला आहे. पुढील तपास महिला पोलीस उपनिरीक्षक चौधरी करीत आहेत.
