जळगाव : प्रतिनिधी
शहरातील पद्मालय रेस्ट हाऊसजवळ एका व्यक्तीला काहीही कारण नसताना एकाने लोखंडी आसारीने मारहाण करीत जखमी केल्याची घटना घडली आहे याप्रकरणी जळगाव शहर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरापासून जवळ असलेल्या कुसुंबा येथील नंदकिशोर उत्तम पाटील (वय ५०) हे आपल्या परिवारासह वास्तव्य असून बिगारीचे काम करून आपला उदरनिर्वाह करतात. दि. सोमवारी १३ नोव्हेंबर रोजी सकाळी ७ वाजता नंदकिशोर पाटील हे बिगारी काम करण्यासाठी ठेकेदारासह पद्मालय रेस्ट हाऊस येथे जमा झाले होते. दरम्यान पद्मालय रेस्ट हाऊसच्या गेट समोर बसलेले असताना पंकज नथू पवार यांच्या चहाच्या टपरीजवळ पप्पू नावाच्या व्यक्तीने शिवीगाळ केली. त्यामुळे नंदकिशोर पाटील यांनी दुर्लक्ष करत तेथून निघून गेले. त्यानंतर पप्पू नावाच्या व्यक्तीने दुचाकीच्या पाठलाग करून काहीही कारण नसताना हातातील लोखंडी आसारीने मारहाण करून डोक्यावर दुखापत केली, तसेच जिवंत सोडणार नाही अशी धमकी दिली. दरम्यान काही नागरिकांनी भांडण सोडवा सोडवा करत जिल्हा शासकीय वैद्यकीय महाविद्यालयात उपचारात दाखल करण्यात आले. याप्रकरणी नंदकिशोर उत्तम पाटील यांनी दिलेल्या फिर्यादीवरून संशयित आरोपी पप्पू (पूर्ण नाव माहित नाही) याच्या विरोधात शहर पोलीस ठाण्यात गुन्हा दाखल करण्यात आला आहे
