छत्रपती संभाजी नगर : वृत्तसंस्था
जिल्ह्यातील वैजापूर तालुक्यातील कापूसवडगाव या गावात दिवाळीच्या दिवशीच पतीने पत्नीची गळा दाबून हत्या केल्याची घटना समोर आले आहे. या प्रकरणी मयत महिलेच्या भावाने दिलेल्या तक्रारीवरून पतीसह सासू-सासू विरोधात खुनाचा गुन्हा दाखल करण्यात आला आहे.
मिळालेल्या माहितीनुसार, भारती संतोष थोरात असे हत्या झालेल्या महिलेचं नाव आहे. तर, संतोष दिनकर थोरात (वय 36 वर्ष), दिनकर माणिकराव थोरात (वय 60 वर्ष), रंजना दिनकर थोरात (वय 50 वर्ष) असे आरोपींचे नावं आहे. भारती ही झोपेतून उठत नसुन ती बेशुद्ध अवस्थेत असल्याचा फोन भारतीचा भाऊ ज्ञानेश्वर भगवान कदम यांना आला होता. तसेच, तिला वैजापुरच्या शासकीय रुग्णालयात दाखल करण्यात आल्याची माहिती ज्ञानेश्वरला मिळाली होती. त्यामुळे आपल्या चुलतभावासह ज्ञानेश्वर वैजापूरच्या शासकीय रुग्णालयात पोहचला. तसेच, अपघात विभागात जावुन बहीणीला पहिले असता तिचा मृत्यू झाला होता. तर, भारतीच्या गळ्यावर गळा दाबल्याचे व्रण दिसत होते. सोबतच गळ्यावर ओरबाडल्याचे खुणा दिसत होत्या. त्या ठिकाणी लाल झाल्याचे दिसत असल्याने तिचा गळा दाबण्यात आल्याचा संशय येत होता. याबाबत, भारतीच्या पती व सासु सासरे यांना विचारणा केली असता त्यांनी उडवाउडवीची उत्तरे दिली. त्यामुळे ज्ञानेश्वर भगवान कदम यांच्या फिर्यादीनुसार गुन्हा दाखल करण्यात आला आहे.
