नवी दिल्ली : वृत्तसंस्था
आग्याच्या ताजगंज येथील एका गेस्ट हाऊसमध्ये एका महिलेवर जबरदस्तीने दारू पाजून सामूहिक बलात्कार केल्याची घटना शनिवारी रात्री उघडकीस आली. याप्रकरणी चार आरोपींना अटक करण्यात आल्याचे पोलिसांनी सांगितले.
गेस्ट हाऊसमधून महिलेचा आरडाओरडा ऐकून स्थानिक लोकांनी पोलिसांना माहिती दिली. पोलिस चौकशीत महिलेने आरोप केला की, तिला गेस्ट हाऊसमध्ये दारू पाजल्यानंतर तिच्यावर सामूहिक बलात्कार करण्यात आला आणि तिने विरोध केल्यावर तिला मारहाण करण्यात आली. सहायक पोलिस आयुक्त अर्चना सिंह यांनी सांगितले की, पोलिसांनी मुख्य आरोपी जितेंद्र राठौरसह त्याचे मित्र रवी राठौर, मनीष कुमार आणि देव किशोर यांना अटक केली आहे. पीडितेची प्रकृती गंभीर असून तिला रुग्णालयात दाखल करण्यात आले आहे. तिला बळजबरी दारू पाजून आरोपींनी तिचा व्हिडीओ रेकॉर्ड केला होता. पीडिता त्यात आरोपींना रडत विनवणी करताना दिसते. मला लहान लहान मुली आहेत. मला जाऊ द्या, असे ती सांगते. मात्र, आरोपींनी तिच्यावर कोणतीही दयामाया दाखविली नाही
