जळगाव : प्रतिनिधी
शहरातील फातेमा नगरातील रहिवासी सलीम राजू पटेल (३६) यांना तुझ्या दुकानामुळे आमचा फर्निचर व्यवसाय चालत नाहीये, असे म्हणत दोन जणांनी मारहाण केली. तू आमच्या नादी लागू नको, नाही तर जिवंत सोडणार नाही, अशी धमकीदेखील दिली. ही घटना १० नोव्हेंबर रोजी संध्याकाळी घडली.
मिळालेल्या माहितीनुसार, सलीम पटेल यांचा फर्निचरचा व्यवसाय आहे. हाच व्यवसाय असलेल्या शिरसोली रस्त्यावरील दोन जणांनी पटेल यांच्या दुकानाजवळ जाऊन तुझ्यामुळे आमचा व्यवसाय चालत नाही, असे म्हणून शिवीगाळ केली. त्यावेळी एकाने लाकडी दांडक्याने कपाळावर व डोळ्यावर, तर दुसऱ्याने मानेवर, हातावर मारून दुखापत केली. याप्रकरणी पटेल यांनी एमआयडीसी पोलिस ठाण्यात फिर्याद दिली. त्यावरून मारहाण करणाऱ्या दोघांविरुद्ध गुन्हा दाखल करण्यात आला आहे. पुढील तपास पोहेकॉ दत्तात्रय बडगुजर करीत आहेत.
