मालेगाव : वृत्तसंस्था
मालेगाव जवळील वाशीम येथे तुरीच्या शेतात काम करताना शेतकऱ्याचा रोटावेटरमध्ये अडकून मृत्यू झाल्याची दुर्देवी घटना आज ८ नोव्हेंबर रोजी दुपारी घडली. राजेश भिमराव सौभागे (३५) असे मृत शेतकऱ्याचे नाव आहे.
मिळालेल्या माहितीनुसार, शहरातील सौभागे कुटुंबीय ज्ञानेश्वर वाढणकर यांच्या मालेगाव शेतशिवारातील शेत मक्त्याने करतात. दरम्यान, या शेतातील तुरीमध्ये रोटावेटर फिरविण्यासाठी त्यांनी एम. एच. ३७ एडी – ४९९८ या क्रमांकाचे ट्रॅक्टर बोलाविले. यावेळी चालक अंकुश चवरे हा ट्रॅक्टर चालवित असताना राजेश हा ट्रॅक्टरवर बसलेला होता. अचानक त्याचा तोल जाऊन राजेश ट्रॅक्टरवरून कोसळून रोटावेटरमध्ये अडकला आणि यातच त्याचा मृत्यू झाला. या घटनेनंतर ट्रॅक्टर चालक अंकुश हा घटनास्थळावरून पळून गेला. अशा आशयाची फिर्याद मृतकाचा भाऊ मदन भिमराव सौभागे यांनी पोलिसात दिली. त्यानुसार पोलिसांनी तत्परतेने घटनास्थळ गाठून पंचनाम्यानंतर मृतदेह उत्तरीय तपासणीसाठी पाठविला. याप्रकरणी ट्रॅक्टर चालकाविरुध्द गुन्हा दाखल करण्यात आला आहे.
