नाशिक : वृत्तसंस्था
कळवण शहरातील गणेश नगर भागातून चार घेवून जाणाऱ्या ट्रॅक्टरवर फटाक्याची ठिणगी पडल्याने चाऱ्याने पेट घेतल्याची घटना गुरुवारी (दि. २) सायंकाळच्या सुमारास घडली. यात चारा पूर्णपणे जळून खाक झाल्याने शेतकऱ्याचे मोठे नुकसान झाले.
यंदा पावसाने देवळा तालुक्याकडे पाठ फिरवल्याने दुष्काळसदृश परिस्थितीत निर्माण झाली आहे. पिण्याच्या पाण्यासोबत जनावरांच्या चाऱ्याचाही प्रश्न गंभीर झाला आहे. खर्डासह देवळा तालुक्यातील असंख्य गावातील शेतकरी जनावरांना लागणारा चारा घेण्यासाठी कळवण तालुक्यात येत आहेत. शेतकरी भास्कर खंडेराव पवार (रा. खर्डा ता. देवळा) हे कळवण तालुक्यातील मानूर येथून गुरुवारी सायंकाळी ६ च्या सुमारास आपल्या ट्रॅक्टरने (क्रमांक एमएच ४१ बीई ८८७०) मका पिकाचा चारा घेऊन जात होते. त्याचवेळी कळवण शहरातील गणेशनगर भागातील पेट्रोल पंपाशेजारील एका बॅनर व्यावसायिकाने घेतलेले नवीन मशीन त्यांच्या दुकानात उतरवत असताना त्यांनी आनंदाच्या भरात फटाक्यांची आतषबाजी केली. त्यावेळी या फटाक्यांची ठिणगी रस्त्यावरून जाणाऱ्या पवार यांच्या ट्रॅक्टरवर पडली आणि चाऱ्याने पेट घेतला. यात चारा जळून खाक झाला. नशीब बलवत्तर म्हणून शेतकरी भास्कर पवार व त्यांचा ट्रॅक्टर बचावला आहे. मात्र त्यांचा चारा व ट्रॉलीचे नुकसान झाले आहे.
