धुळे : वृत्तसंस्था
भरधाव वेगात आलेल्या ट्रकची महिलेला धडक बसली. अपघाताची ही घटना साक्री तालुक्यातील सामोडे चौफुलीवर शुक्रवारी सकाळी घडली. उपचार सुरू असताना महिलेचा मृत्यू झाला. हिराबाई सदाशिव सोनवणे (वय ६०) असे मयत झालेल्या महिलेचे नाव आहे.
मिळालेल्या माहितीनुसार, धुळे जिल्ह्यातील साक्री तालुक्यातील सामोडे येथील हिराबाई सोनवणे या शुक्रवारी सकाळी बाजार करण्यासाठी जात होत्या. त्यावेळी चौफुलीवर त्यांना दहिवेलकडून सटाण्याकडे जाणाऱ्या ट्रकने जोरदार धडक दिली. त्यांच्या दोन्ही पायावरून ट्रकचे मागचे चाक गेले. यात त्यांना गंभीर दुखापत झाली. अपघाताच्या या घटनेनंतर हिराबाई यांना खासगी वाहनाने पिंपळनेर येथील ग्रामीण रुग्णालयात दाखल करण्यात आले. त्यावेळी महिलेची प्रकृती गंभीर होती. उपचार सुरू असताना दुपारी हिराबाई यांचा मृत्यू झाला. याप्रकरणी ट्रकचालकाविरोधात पिंपळनेर पोलिस ठाण्यात अपघाताची नोंद करण्यात आली.
